Валюта курслари:

ЎзРВБда очилиш аукциони курси:

1 USD = UZS ()


18.08.2023

Ўзбекистон Республикаси валюта биржаси ва Қозоғистон фонд биржаси ўртасида Ҳамкорлик меморандуми имзоланди

2021 йил 28 сентябр куни Тошкент шаҳрида Қозоғистон фонд биржаси (KASE) томонидан Ўзбекистон Республикаси валюта биржаси (ЎзРВБ) кўмагида “KASE day in Tashkent” тадбири ташкил этилди.

Тадбир давомида икки давлат фонд бозорининг профессионал иштирокчилари ўртасидаги ҳамкорлик имкониятлари муҳокама қилиниб, Ўзбекистон биржа бозори иштирокчилари Қозоғистон биржа бозорининг ҳозирги ҳолати ва ривожланиш истиқболлари, KASE молиявий инструментлари ва хизматлари, Қозоғистон фонд бозорида Ўзбекистон компаниялари учун капитални жалб қилиш шартлари ва инвестиция салоҳияти билан танишдилар.

Тадбирда, глобаллашув жараёнлари ҳамда интеграцион жараёнларни фаоллашуви икки томонлама алоқаларни мустаҳкамлаш зарурлигини кучайтираётганлиги ҳамда Қозоғистон ва Ўзбекистон савдо қатнашчилари ва инвесторларига икки мамлакат биржа бозорларида ўзаро қатнашиш учун шарт-шароитлар яратиш ҳамкорликнинг устувор вазифаларидан бири эканлиги таъкидланди.

“KASE day in Tashkent” доирасида ЎзРВБ ва KASE ўртасида Ҳамкорлик тўғрисидаги Меморандум имзоланди. Расмий имзолаш маросимида ЎзРВБ Бош директори Рашид Усмонов ва KASE Бошқаруви Раиси ўринбосари Ермек Мажекенов иштирок этди.

Меморандумда ҳамкорликнинг истиқболли йўналишларини аниқлаш, биржа савдоси орқали тадбиркорлик фаолиятини қўллаб-қувватлаш ва рағбатлантириш соҳасида тажриба алмашиш, биржа маҳсулотлари ва хизматларини оммалаштиришга кўмаклашиш, шунингдек, биржа савдолари иштирокчилари доирасини кенгайтириш кўзда тутилган.

Меморандумга мувофиқ биржа инструментларини қўллаш ва биржа савдо технологияларини ривожлантириш, биржаларнинг электрон тизимлари орқали ахборот технологиялари инфратузилмасини такомиллаштириш, шунингдек, икки мамлакат биржа бозорларининг ҳозирги ҳолати ва ривожланиш истиқболлари ҳақида маълумот алмашиш бўйича тажриба орттириш режалаштирилган.

Ҳамкорлик доирасида биржа савдоси инструментларини қўллаш масалалари бўйича қўшма конференциялар ва ўқув семинарлари, стажировкалар, давра суҳбатлари, онлайн учрашувлар ва бошқаларни ташкил этиш орқали ходимлар малакасини ошириш соҳасида тажриба алмашиш ҳам кўзда тутилган.

Поделиться новостью

Контакты пресс-центра

Копировать весь текст