Валюта курслари:
ЎзРВБда очилиш аукциони курси:
1 USD = UZS ()
02.04.2025
ЎзРВБнинг 2024 йилдаги коррупцияга қарши курашиш фаолияти якунлари
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида ЎзРВБ Фаолиятини ҳуқуқий таъминлаш бошқармаси бошлиғи Жамшид Худойбердиевнинг брифинги бўлиб ўтади.Брифинг матни билан қуйида танишишингиз мумкин.
Бугунги кунда коррупцияга қарши сиёсат самарали корпоратив бошқарувнинг ажралмас қисмига айланиб бормоқда. 2024 йилда "Ўзбекистон республика валюта биржаси" акциядорлик жамияти ўз фаолиятининг барча бўғинларида коррупциявий ҳолатларга йўл қўймаслик ва уларнинг олдини олиш бўйича тизимли ёндашувни намойиш этди.
Тизимли ёндашув ва норматив-ҳуқуқий база
2024 йилда ЎзРВБда “Коррупцияга қарши курашиш бўйича чора-тадбирлар режаси”да тасдиқланди ва унга кўра тегишли тадбирлар амалга оширилди. Улар қаторида ходимларни одоб-ахлоқ қоидалари ва коррупцияга қарши курашиш маданияти бўйича ўқитиш дастури ҳам ўрин тутган. Ўтказилган тадбирларнинг ижроси бўйича мунтазам равишда Ўзбекистон Республикасининг ваколатли давлат органига ҳисоботлар тақдим этилди, бу эса, амалга оширилаётган ишларнинг шаффофлиги ва ҳисобдорлигидан далолат беради.
Шунингдек, 2024 йилда норматив-ҳуқуқий базани шакллантиришга алоҳида эътибор қаратилди.
Хусусан, ISO 37001:2016 халқаро стандарти ва Коррупцияга қарши курашиш агентлиги тавсияларига мувофиқ 13 та ички ҳужжат тасдиқланди. Улар орасида коррупцияга қарши курашиш сиёсати, хавф-хатарларни баҳолаш методологияси, коррупциявий ҳаракатлар ҳақида хабар бериш тартиби, одоб-ахлоқ кодекси, контрагентлар ва ишга номзодларни текшириш бўйича йўриқномалар ва бошқалар ўрин олган.
Хавфларни назорат қилиш ва қонунчиликка риоя этиш
2024 йилда биржа фаолиятининг барча йўналишлари чуқур таҳлил этилди. ЎзРВБ Уставида белгиланган барча хизмат турлари ва вазифалар коррупция хавфи паст бўлган соҳалар сифатида баҳоланди. Ходимлар билан ўтказилган тушунтириш ишлари давомида эҳтимолий заифликларни аниқлаш ва ички назорат чораларини кучайтиришга алоҳида эътибор қаратилди. Бундан ташқари, ЎзРВБда “Манфаатлар тўқнашуви тўғрисида”ги Ўзбекистон Республикаси Қонунинининг ижросини таъминлашга қаратилган дастур жорий этилган. Мазкур тадбирлар доирасида ходимларнинг 57 та аризаси текширувдан ўтказилди.
Шунингдек, 11 нафар номзод муваффақиятли синовдан ўтказилиб, ишга қабул қилинди.
Ташқи ва ички ўзаро алоқаларни назорат қилиш
Хўжалик ва меҳнат шартномаларига коррупцияга қарши мажбурий қоидалар киритилди. Унга кўра, ходимлар нафақат коррупцион хатти-ҳаракатларнинг ҳар қандай кўринишларидан ўзини тийиши, балки ҳамкасблари ёки учинчи шахслар томонидан қоидабузарликларга уринишлар ҳақида хабар бериши шарт. Шунингдек, давлат харидлари тартиб-таоимилларидан келиб чиқиб, 36 та ҳамкор ташкилот текширувдан ўтказилди. Уларнинг барчаси бўйича ижобий хулосалар берилган ва натижалар тўғрисидаги маълумотлар махсус реестрга киритилган.
Ўқитиш ва хабардорликни ошириш
ЎзРВБнинг коррупцияга қарши курашиш сиёсатининг асосий таркибий қисмларидан бири — тизимли ўқитишдир. Йил давомида ходимлар учун коррупцияга қарши курашиш мавзусида 11 та семинар ва давра суҳбатлари ўтказилди. Бунда, манфаатлар тўқнашуви, одоб-ахлоқ ва ҳуқуқий онгни юксалтириш масалаларига алоҳида эътибор қаратилди. Хусусан, ходимлар edu.proacademy.uz платформасида онлайн ўқитилиб, сертификатлар олинди. Қўшимча равишда Адлия вазирлиги платформаси орқали коррупцияга қарши курашиш ва манфаатлар тўқнашуви бўйича қонун ҳужжатларини билиш даражаси бўйича тест синовлари ташкил этилди. ЎзРВБнинг расмий веб-сайтида Бош директорнинг ходимлар ва жамоатчиликни коррупцияга нисбатан муросасиз бўлишга даъват этувчи мурожаати жойлаштирилган.
Шаффофлик ва назорат
Шаффофликни таъминлаш мақсадида эҳтимолий коррупциявий ҳуқуқбузарликлар ҳақида хабар бериш учун тўртта канал — электрон почта, Телеграм-бот, ишонч телефони, шунингдек, Биржанинг расмий веб-сайтидаги мурожаатнинг махсус шакли фаолият юритмоқда. 2024 йилда мазкур каналлар орқали коррупция ёки манфаатлар тўқнашуви ҳақида бирорта хабар келиб тушмади. Шунингдек, ишга қабул қилиш ва давлат харидлари жараёнларида қонунбузарлик ҳолатлари аниқланмади.
2025 йилда ЎзРВБ коррупцияга қарши курашиш бўйича ўз олдига қуйидаги вазифаларни қўймоқда:
- коррупцияга қарши курашишга оид барча ички ҳужжатларнинг самарали ижросини таъминлаш;
- коррупцияга нисбатан муросасизлик корпоратив маданиятини мустаҳкамлаш;
- ходимларни мунтазам равишда ўқитиш ва уларнинг билимларини синовдан ўтказиш;
- ҳуқуқий маданиятни юксалтиришга қаратилган кўргазмали материаллар яратиш;
- тизимли мониторинг ва ҳисобдорликни йўлга қўйиш.
Хулоса
ЎзРВБ тажрибаси шуни кўрсатадики, коррупцияга қарши курашиш нафақат қонунчиликка риоя қилиш, балки ҳамкорлар, савдо иштирокчилари ва умуман жамият ишончини шакллантирувчи стратегик устувор йўналишдир.
Шаффофлик, тизимлилик ва доимий такомиллашишга интилиш ЎзРВБнинг коррупцияга қарши сиёсатини ҳалол ва самарали фаолиятни таъминлашда таъсирчан воситага айлантиради.





