Валюта курслари:

ЎзРВБда очилиш аукциони курси:

1 USD = UZS ()


30.06.2026

Dealers Meet Up by UZCE: ЎзРВБнинг савдо иштирокчилари профессионал ҳамжамияти учун янги эксперт платформаси

“Ўзбекистон республика валюта биржаси” АЖ томонидан илк Dealers Meet Up by UZCE ташкил этилди. Ушбу янги эксперт платформаси савдо иштирокчилари ўртасида профессионал ҳамкорликни мустаҳкамлаш, молия бозоридаги долзарб тенденцияларни муҳокама қилиш ҳамда янги биржа инструментларини амалий жиҳатдан ўзлаштиришга қаратилган.
Биринчи учрашув ЎзРВБ аъзоси бўлган банкларнинг 35 нафардан ортиқ вакилларини қамраб олди. Улар қаторида биржа бозорларининг фаол иштирокчилари — ТИФ Миллий банки, Капиталбанк, Octobank, Ўзсаноатқурилишбанк, Asia Alliance Bank ва бошқа тижорат банклар вакиллари ҳам қатнашди.

Учрашувнинг биринчи сессияси давомида иштирокчиларга «ЎзРВБ валюта бозори савдоларида замонавий ёндашувлар ва амалий жиҳатлар» мавзуси тақдим этилди. Мазкур мавзу доирасида асосий эътибор валюта бозори фаолиятининг муҳим жиҳатларига, жумладан, валюта курсини шакллантириш механизмлари, маркет-мейкерлар фаоллигини ошириш, шунингдек, биржа савдолари ликвидлиги ва самарадорлигини таъминлашда тижорат банкларининг ортиб бораётган ролига қаратилди.

Хорижий валютани сотиб олиш ва сотиш бўйича савдо стратегияларини танлашда тижорат банкларининг мустақиллиги амалий аҳамиятга эга экани алоҳида таъкидланди. Хусусан, бугунги шароитда савдо иштирокчилари нафақат бозор конъюнктурасига тезкор муносабат билдириши, балки талаб, таклиф, ликвидлик даражаси ва жорий бозор кутилмаларини инобатга олган ҳолда асосли қарорлар қабул қилиб, нарх шаклланиши жараёнида янада фаол иштирок этиши лозимлиги қайд этилди.

Сессия доирасида валюта бозорида операцияларни амалга оширишнинг амалий жиҳатлари, шу жумладан, буюртмаларни киритиш ва ижро этиш тартиботи, битим тузиш учун қулай вақтни танлаш, жорий талаб ва таклифни баҳолаш, шунингдек, савдо иштирокчиларининг ҳаракатлари бозор курсининг шаклланишига таъсири ҳам кўриб чиқилди.

Тижорат банклари хорижий валютани сотиб олиш ва сотиш бўйича қарорлар қабул қилишда нафақат бозордаги жорий ҳолатни, балки ликвидлик бўйича эҳтиёжлари, мижозлар буюртмалари ҳамда бозор конъюнктурасида юз бериши мумкин бўлган ўзгаришларни ҳам ҳисобга олиши зарурлиги алоҳида қайд этилди. Банкларнинг савдоларда янада фаол иштирок этиши валюта бозори ликвидлигини оширишга, савдолар шаффофлигини таъминлашга ҳамда бозор курсининг янада самарали шаклланишига хизмат қилади.

Учрашувнинг иккинчи сессияси «ЎзРВБда янги турдаги РЕПО операциялари: имкониятлар ва долзарб масалалар» мавзусига бағишланди. Қатнашчилар ЎзРВБда яқин кунларда янги инструмент — Reverse РЕПО (тескари РЕПО)ни жорий этиш режалаштирилаётгани, унинг асосий хусусиятлари, савдо иштирокчилари учун афзалликлари ва уни амалиётда қўллаш имкониятлари ҳақида хабардор қилинди.

Тадбирнинг амалий қисми Hands-on Session форматида ташкил этилди. Унда иштирокчилар реал биржа операцияларига яқинлаштирилган амалий топшириқларни бажариб, олинган билимларни мустаҳкамлаш, янги функционалнинг айрим элементларини синовдан ўтказиш ҳамда юзага келган саволлар бўйича биржа мутахассисларидан маслаҳат олиш имкониятига эга бўлдилар.

Тадбир якунида ўтказилган очиқ мулоқот давомида иштирокчилар биржа инструментларидан фойдаланишнинг амалий жиҳатлари юзасидан фикр алмашиб, ўз тажрибалари билан ўртоқлашдилар ҳамда ЎзРВБ хизматлари ва инфратузилмасини янада такомиллаштириш бўйича таклифларни билдирдилар.

Dealers Meet Up by UZCE лойиҳасининг йўлга қўйилиши ЎзРВбнинг савдо иштирокчилари билан очиқ ва конструктив ҳамкорликни янада мустаҳкамлашга қаратилган навбатдаги муҳим қадам бўлди. Мазкур формат эксперт маърузалари, амалий машғулотлар ва бозор иштирокчилари билан тўғридан-тўғри мулоқотни ўзида мужассам этган ҳолда, уларнинг касбий салоҳиятини юксалтириш ҳамда мамлакатда замонавий биржа инфратузилмасини янада ривожлантиришга хизмат қилади.


 

Поделиться новостью

Контакты пресс-центра

Копировать весь текст