Валюта курслари:
ЎзРВБда очилиш аукциони курси:
1 USD = UZS ()
15.05.2026
ЎзРВБ вакиллари “IFN Uzbekistan Forum 2026” халқаро форумида иштирок этди
Ўзбекистон республика валюта биржаси вакиллари Ўзбекистон банклари ассоциацияси ҳамда дунё бўйлаб исломий молия соҳасида медиа хизматлар кўрсатишга ихтисослашган RedMoney Group компанияси ҳамкорлигида ташкил этилган “IFN Uzbekistan Forum 2026” халқаро форумида иштирок этдилар.
Бугунги кунда ислом молияси жаҳон молия тизимининг энг жадал ривожланаётган йўналишларидан бирига айланмоқда. Кўплаб мамлакатларда исломий молиявий инструментлар ва хизматлар капитал бозорининг муҳим таркибий қисми сифатида инвестицион жозибадорликни ошириш, молиявий хизматлардан фойдаланиш имкониятларини кенгайтириш ҳамда барқарор иқтисодий ўсишни қўллаб-қувватлашга хизмат қилмоқда.
Шу нуқтаи назардан, “IFN Uzbekistan Forum 2026” форуми молия сектори вакиллари, халқаро ташкилотлар, банклар ҳамда соҳа экспертлари ўртасида очиқ мулоқот ўтказиш учун муҳим майдонга айланди. Тадбир доирасида иштирокчилар Ўзбекистон ва Марказий Осиё минтақасида исломий молияни ривожлантиришнинг долзарб тенденциялари ҳамда истиқболларини муҳокама қилдилар.
Форум давомида ЎзРВБ мутахассислари исломий молия ва капитал бозорларини ривожлантириш бўйича халқаро тажриба билан танишдилар, хорижий экспертлар ва молия институтлари вакиллари билан фикр алмашдилар, шунингдек, ҳамкорликни ривожлантириш ҳамда замонавий молиявий ечимларни жорий этишнинг истиқболли йўналишларини муҳокама қилдилар.
ЎзРВБ учун бундай халқаро тадбирларда иштирок этиш биржа бозорини янада ривожлантириш ҳамда замонавий жаҳон амалиётларини ўрганиш нуқтаи назаридан муҳим аҳамиятга эга. Биржа ўз профессионал салоҳиятини изчил ошириб бориш билан бирга, замонавий молиявий инфратузилмани шакллантираётган глобал тенденцияларни чуқур ўрганишга алоҳида эътибор қаратмоқда.





