Валюта курслари:
ЎзРВБда очилиш аукциони курси:
1 USD = UZS ()
10.09.2026
Raiffeisen Bank International AG ЎзРВБда давлат қимматли қоғозлари бўйича битимлар тузишни бошлади
Ўзбекистон республика валюта биржасининг савдо платформасида Raiffeisen Bank International AG (RBI) давлат қимматли қоғозлари билан операцияларни амалга оширишга киришди. Мазкур операциялар етакчи халқаро банклардан бирини Ўзбекистон молия бозори инфратузилмасига интеграция қилиш бўйича изчил амалга оширилган ишларнинг амалий натижаси бўлди.
Дастлабки операция халқаро молия институтларининг давлат қимматли қоғозлари миллий бозорига кириши учун яратилган механизм амалда ишлашини кўрсатди. Бу жараён регулятор томонидан рухсат бериш ва зарур ҳисобварақаларни очишдан тортиб, битимларни савдо, операцион, ҳисоб-китоб-клиринг ва ҳисобга олиш жараёнлари билан тўлиқ қўллаб-қувватлашгача бўлган барча босқичларни қамраб олади.
RBIнинг Ўзбекистон уюшган молия бозорида фаолият бошлашига қатор идоралараро ва институционал чора-тадбирлар замин яратди. Жумладан, 2025 йил декабрь ойида Истиқболли лойиҳалар миллий агентлиги Raiffeisen Bank International AGни капитал бозори соҳасидаги «Тартибга солиш қумдони» махсус ҳуқуқий режими иштирокчиси сифатида рўйхатдан ўтказди.
Сўнгра RBI учун Ўзбекистон Республикаси Марказий банкида миллий ва хорижий валюталарда вакиллик ҳисобварақлари очилди. Шунингдек, RBI ва Қимматли қоғозлар марказий депозитарийси ўртасида корреспондентлик муносабатларини ўрнатиш ҳамда тегишли ҳисобварақ очиш бўйича келишув имзоланди.
Кейинги босқичда маҳаллий бозорда операцияларни амалга ошириш модели шакллантирилди. 2026 йил июнь ойида Raiffeisen Bank International Капиталбанкни давлат қимматли қоғозлари бозоридаги агенти сифатида танлади. Ҳамкорлик доирасида Капиталбанк RBIнинг давлат қимматли қоғозлари ва бошқа молиявий инструментлар билан операцияларини савдо ва операцион жиҳатдан таъминлайди.
ЎзРВБда биринчи битимнинг амалга оширилиши тайёргарлик ишларининг амалий якуни бўлиб, институционал ва техник шарт-шароитларни яратиш босқичидан халқаро банкнинг Ўзбекистон давлат қимматли қоғозлари бозорида хорижий номинал сақловчи сифатида бевосита иштирок этишига ўтилганини англатади.
Мазкур ташаббус миллий капитал бозорини ривожлантириш, унинг халқаро молия тизими билан ўзаро интеграциясини кучайтириш ва хорижий инвесторлар учун бозор инфратузилмасининг очиқлигини оширишга қаратилган стратегик ишлар билан уйғун равишда амалга оширилмоқда.
Халқаро банклар ва институционал инвесторларнинг давлат қимматли қоғозлари бозоридаги иштирокини кенгайтириш инвесторлар таркибини диверсификация қилиш, иккиламчи бозордаги савдо фаоллигини ошириш ва молиявий инструментлар ликвидлигини кучайтириш учун муҳим омил ҳисобланади.
Келгусида халқаро иштирокнинг кенгайиши хорижий капитал оқимини ошириш, миллий валютадаги молиявий инструментлар бозорини ривожлантириш ҳамда иқтисодиёт учун барқарор ва узоқ муддатли молиялаштириш манбаларини шакллантиришга ижобий таъсир кўрсатиши кутилмоқда.
ЎзРВБ нуқтаи назаридан, RBI иштирокидаги мазкур битим биржа инфратузилмасининг халқаро молия институтлари билан операцияларни самарали ташкил этишга тайёр эканини кўрсатади. Бу эса хорижий инвесторлар доирасини янада кенгайтириш ва Ўзбекистон молия бозорининг халқаро инвестиция жараёнларига интеграциялашувини жадаллаштириш учун муҳим асос яратади.
Ўзбекистон республика валюта биржаси савдо инфратузилмасини такомиллаштириш, халқаро стандартлар ва замонавий бозор амалиётларини жорий этиш, шунингдек инвесторларнинг Ўзбекистон молия бозори инструментларига ишончли, шаффоф ва самарали киришини таъминлаш бўйича ишларни давом эттиради.
Маълумот учун: Raiffeisen Bank International AG — Марказий ва Шарқий Европанинг етакчи банк гуруҳларидан бири. Банк халқаро ва корпоратив мижозларга, институционал инвесторлар ҳамда активларни бошқариш компанияларига хизмат кўрсатиб, инвестиция банкинги, капитал бозорлари ва кастодиал хизматлар йўналишларида ҳам фаолият юритади.





