Валюта курслари:
ЎзРВБда очилиш аукциони курси:
1 USD = UZS ()
18.11.2026
ЎзРВБ Bank of Georgia ва The Bank of New York Mellon билан ҳамкорлик истиқболларини муҳокама қилди
Ўзбекистон республика валюта биржаси (ЎзРВБ)да JSC Bank of Georgia ва The Bank of New York Mellon банклари вакилларидан иборат қўшма делегация билан ишчи учрашув бўлиб ўтди. Музокараларнинг асосий мавзулари ўзаро ҳамкорликнинг жорий масалалари ва истиқболлари, жумладан, Ўзбекистон давлат қимматли қоғозлари бозоридаги ҳамкорликдан иборат бўлди.

Учрашувда ЎзРВБ томонидан тегишли таркибий бўлинмалар мутахассислари иштирок этди. Қўшма делегация таркибида JSC Bank of Georgia банкининг глобал банк бизнеси йўналишида ҳамкорлар билан ишлаш бўлими раҳбари Теона Еристави, мазкур йўналиш мутахассиси Кристин Тордия, шунингдек, The Bank of New York Mellon банкининг корреспондентлик тармоғини бошқариш бўйича катта вице-президенти Брайан Элес қатнашди.
Учрашув аввалида меҳмонлар ЎзРВБнинг жорий фаолияти билан батафсил таништирилди. Музокаралар давомида биржа тўғрисида маълумотларни янгилашни назарда тутувчи due diligence (комплекс текширув) тартиб-таомилига алоҳида эътибор қаратилди. Томонлар биржа савдоларида иштирок этишга рухсат бериш ва иштирокчиларни текшириш (KYC) тартиблари, савдо жараёнидаги операциялар мониторинги, клиринг ва ҳисоб-китоблар, рискларни бошқариш, шунингдек, ахборот хавфсизлиги ва биржа фаолиятининг узлуксизлигини таъминлаш масалаларини батафсил кўриб чиқдилар.
Музокараларда давлат қимматли қоғозлари бозори соҳасидаги ҳамкорлик масалалари алоҳида ўрин тутди. Учрашув иштирокчилари Ўзбекистон давлат қимматли қоғозлари билан операциялар доирасида The Bank of New York Mellon ва унинг мижозлари билан ҳамкорлик қилишнинг эҳтимолий йўналишларини муҳокама қилдилар.
Учрашув конструктив ва очиқ руҳда ўтиб, томонларнинг шериклик алоқаларини ривожлантиришдан ўзаро манфаатдор эканлигини яққол намоён этди ҳамда халқаро ҳамкорлик истиқболларини муҳокама қилиш ва ЎзРВБнинг хорижий молия институтлари билан ўзаро ҳамкорлигини мустаҳкамлаш бўйича муҳим мулоқот майдонига айланди.





