Валюта курслари:
ЎзРВБда очилиш аукциони курси:
1 USD = UZS ()
04.11.2025
ЎзРВБ бозорларида маркет-мейкерлар сони ошмоқда
ЎзРВБ маркет-мейкерлар институтини ривожлантириш, валюта бозори ликвидлиги ва шаффофлигини ошириш, шунингдек савдо иштирокчилари ўртасида ўзаро ҳамкорлик учун қулай шароитлар яратиш бўйича изчил сиёсатни амалга оширишни давом эттирмоқда.
Ушбу амалга оширилаётган ишлар доирасида ЎзРВБнинг валютавий своп бозорида маркет-мейкерлар учун самарали дастурлар ишлаб чиқилган бўлиб, "Капиталбанк" АТБ SWAP_USD/UZS_ON инструменти бўйича маркет-мейкерлик хизматларини кўрсатиш имкониятини қўлга киритди.
Бундан аввал "Капиталбанк" АТБга валюта спот бозорида USD/UZS валюта жуфтлиги бўйича, шунингдек, иккиламчи бозорда давлат қимматли қоғозлари ва РЕПО операциялари бўйича маркет-мейкер вазифаларини амалга ошириш ҳуқуқи берилган эди.
Таъкидлаш жоизки, валютавий своп инструменти бозор иштирокчилари учун қисқа муддатли ликвидликни самарали бошқариш ҳамда валюта позицияларини оптималлаштириш жараёнида муҳим роль ўйнайди. Бу эса валюта операцияларининг мослашувчан ва замонавий механизмларини ривожлантиришга кўмаклашади.
Своп — икки томон ўртасида олдиндан келишилган курс асосида маълум вақтдан сўнг қайта алмаштириш мажбурияти билан амалга ошириладиган валюта айирбошлаш операциясидир.
ЎзРВБ ривожланиш стратегиясига мувофиқ маркет-мейкерлар институтини ривожлантириш муҳим йўналишлардан бири саналади. Бу банклараро ҳамкорликни чуқурлаштиришга, валюта хатарларини хежлаш воситаларини кенгайтиришга ҳамда Ўзбекистон молия бозорининг халқаро стандартларга мос, замонавий, рақобатбардош ва барқарор инфратузилмасини шакллантиришга хизмат қилади.
Маркет-мейкерлар сонининг кўпайиши молиявий институтларнинг ишончи ортиб бораётганини кўрсатади ва ЎзРВБнинг Ўзбекистонда замонавий ҳамда барқарор валюта бозорини шакллантириш учун марказий платформа сифатидаги ўрнини тасдиқлайди.





