Валюта курслари:

ЎзРВБда очилиш аукциони курси:

1 USD = UZS ()


06.02.2026

Чехиядаги халқаро семинар: ЎзРВБ ходимлари Европа Иттифоқи молия бозорлари билан танишди

Ўзбекистон республика валюта биржаси (ЎзРВБ) вакиллари Прага шаҳрида (Чехия Республикаси) Европа амалий фанлар ва менежмент институти томонидан Европа Иттифоқи давлатларидаги валюта, пул, давлат қимматли қоғозлари ҳамда муддатли битимлар  бозорларида замонавий фаолият юритиш механизмлари мавзусида ўтказилган ўқув-амалий семинарда иштирок этдилар.
Дастур доирасида Биржа савдолари бошқармаси бошлиғи Х. Табибов ва Ҳисоб-китоб-клиринг палатаси раҳбари С. Якубова Европа Иттифоқи ҳамда Чехия валюта бозорининг тузилиши, замонавий савдо моделлари, ликвидликни таъминлашда маркет-мейкерларнинг ўрни, шунингдек, клиринг ва ҳисоб-китоблар амалиёти билан танишдилар. Семинар давомида валюта бозори инструментлари — спот, форвард, своп операциялари ҳамда Bloomberg FXGO, Reuters Dealing ва EBS каби савдо платформалари фаолиятига алоҳида эътибор қаратилди.
Шунингдек, семинар сессиялари давомида муддатли бозор ва ҳосилавий молиявий воситаларга, жумладан фьючерслар, опционлар, фоиз ва валюта свопларини ўз ичига олган мавзулар муҳокама қилинди. Семинар иштирокчилари валюта ва фоиз хатарларини хежлаш, ликвидликни бошқариш ҳамда молия бозорларида стресс-сценарийларни қўллаш бўйича Европа тажрибаси юзасидан фикр алмашилди.
Семинар давомида ЎзРВБ ходимлари Чехия пул бозорининг ўзига хос жиҳатлари, РЕПО операциялари ва банклараро кредитлаш механизмлари, шунингдек Марказий банк томонидан пул-кредит сиёсатини амалга ошириш амалиёти билан танишдилар. Давлат қимматли қоғозлари бозорида аукционларни ўтказиш тартиби, иккиламчи бозорнинг ишлаш механизми ҳамда маркет-мейкерлар фаолияти масалалари кенг ёритилди.
Дастур доирасида иштирокчилар Чехия банкларига ташриф буюриб, уларнинг фаолияти билан амалда танишиш имкониятига эга бўлдилар. Таълим курси якунида барча иштирокчиларга Европа амалий фанлар ва менежмент институтининг сертификатлари топширилди.
ЎзРВБ ходимларининг мазкур халқаро семинарда иштирок этиши Ўзбекистон Республикасининг молиявий инфратузилмаси ва капитал бозорини янада ривожлантириш мақсадида илғор Европа тажрибасини ўрганишда муҳим қадам бўлди.

Поделиться новостью

Контакты пресс-центра

Копировать весь текст