Валюта курслари:
ЎзРВБда очилиш аукциони курси:
1 USD = UZS ()
05.11.2024
Бутунжаҳон жамғариш куни: ЎзРВБ ёш авлодни молия оламига жалб этмоқда
Ўзбекистон республика валюта биржаси (ЎзРВБ) томонидан Ўзбекистон Марказий банки билан ҳамкорликда Республика Болалар кутубхонасида Бутунжаҳон жамғариш куни муносабати билан ўқув тадбири ўтказилди. Учрашув мақсади — болаларга молиявий саводхонлик асосларини ўргатиш ҳамда пул маблағларини режалаштириш ва оқилона бошқаришнинг аҳамиятини тушунтириш.
Тадбирда қатнашган мактаб ўқувчилари ва ўсмирлар учун ЎзРВБ ходими Адҳам Асқаров тақдимот ўтказиб, шахсий маблағларни бошқаришнинг асосий тамойиллари тўғрисида тушунарли ва қизиқарли тарзда сўзлаб берди. Болалар жамғариш нималигини, маблағларни оқилона бошқаришда нима муҳимлигини ва ёшликдан ўз бюджетини қандай шакллантириш мумкинлигини ўргандилар.
Тақдимотда А.Асқаров ҳоҳиш ва эҳтиёжни фарқлаш қанчалик муҳимлиги, молиявий режалаштириш келажакда мақсадларга эришишда қандай ёрдам беришини тушунтирди. У ҳаётий мисоллар ва ёрқин иллюстрациялар ёрдамида оз-оздан, лекин мунтазам равишда жамғариш вақт ўтиб сезиларли натижа бериши мумкинлигини кўрсатди. Тақдимот давомида чўнтак пулларини бошқариш ва кераксиз харажатлардан йироқ бўлиш бўйича амалий маслаҳатлар берилиб, бу молиявий мустақиллик йўлидаги биринчи қадам бўлиши мумкинлиги таъкидланди.
Асосий мавзудан ташқари, А.Асқаров турли мамлакатлар биржалари фаолияти, хусусан, ЎзРВБ ҳақида сўзлаб берди, шунингдек, болаларда қизиқиш уйғотган молиявий мавзуга оид саволларга жавоб берди.
ЎзРВБ ва Ўзбекистон Марказий банки ташаббуси болалар ва уларнинг ота-оналари томонидан ижобий баҳоланиб, бундай тадбирлар ёшларда молиявий билимларни шакллантиришда муҳим аҳамиятга эга эканлигини таъкидладилар.





